काठमाडौं : सिनेमा ‘लालिमा’को दोस्रो टिजर सार्वजनिक भएको छ । तीन हजार यौनकर्मीको अनुभव र समस्यामा आधारित रहेर बनाइएको यस सिनेमाको दोस्रो टिजरमा शीर्ष नायिका रोशनी कार्की केन्द्रित छ ।
करिब एक मिनेटको टिजरमा रोशनीसँग नायिकाहरु सुष्मा निरौला, उषा रजक र नायक जीवन भट्टराई जोडिएका छन् । समस्यामा परेकी रोशनीलाई सुष्मा र उषाले साथ दिएको टिजरमा देख्न सकिन्छ । कलाकार शिशिर वाङ्देल र सबिन कट्टेललाई पनि टिजरमा अटाएका छन् ।
यौनकर्मीको चरित्रमा रहेकी रोशनीको काखमा रहेको बच्चा टिजरको मुख्य आकर्षण हो । टिजरको सुरुवातमा यौनकर्मीको चरित्रमा देखिएकी रोशनीलाई अन्त्यतिर शिशुको साथमा शहर बाहिर पुगेको देख्न सकिन्छ । यी दृश्यले उनको चरित्रको उत्तार–चढावमार्फत् तीन हजार यौनकर्मीको जीवन जटिलता सिनेमामा देखाइएको संकेत गर्छ ।
फागुन २९ बाट प्रदर्शनमा आउने सिनेमा ‘लालिमा’को लेखक र निर्देशक रोशन मिराज हुन् । फेथ आस्थाको प्रस्तुतिमा बनेको यस सिनेमाकी कार्यकारी निर्माता रीना लामा हुन् । गौतम राज खड्काले सम्पादन गरेको सिनेमालाई नेसनल सिने ग्रुप नेपालले वितरणको जिम्मेवारी लिएको छ ।
