काठमाडौं। आगामी असोज ३१ गते तिहारको अवसर पारेर प्रदर्शनमा आउने सिनेमा ‘जेरी अन टप’ को निर्माण टिम यतिबेला भारतको जयपुरमा व्यस्त छ। सिनेमाको एक गीतको छायांकनका लागि मुख्य कलाकार अनमोल केसी र आँचल शर्मा सहित निर्माता, निर्देशक र प्राविधिक टोली राजस्थान पुगेको हो।
प्राप्त तस्बिरहरूमा अनमोल र आँचल रोमान्टिक अवतारमा देखिएका छन्। निर्माण टिमले त्यहाँ एक गीतको छायांकन सकेर शनिबार नेपाल फर्किने जनाएको छ।
अनन्या फिल्मस् प्रा.लि. को ब्यानरमा निर्माण भएको यस सिनेमामा अनमोल र आँचलसँगै जसिता गुरुङ, केदार घिमिरे ‘माग्नेबुढा’, भुवन केसी, सुरक्षा पन्त र उषा खड्की जस्ता चर्चित कलाकारको अभिनय रहेको छ। सुयोग गुरुङ निर्देशित यो सिनेमाको कथा हेमराज बिसीले लेखेका हुन्।
सरोज न्यौपानेले निर्माण गरेको यस सिनेमामा रोबिन शेरचन, रामकृष्ण श्रेष्ठ र दीपक भण्डारीले पनि लगानी साझेदारी गरेका छन्। सिनेमामा कालिप्रसाद बाँस्कोटा, जयन जे वाइबा, जोहन चाम्लिङ राई र व्रिजेश श्रेष्ठको संगीत छ।
विस्वास तिम्सिनाको पटकथा र दुलिप रेग्मीको छायांकन रहेको यो सिनेमाको अन्तर्राष्ट्रिय वितरण अधिकार (अस्ट्रेलियाबाहेक) हङकङको एलजी एसोसिएट्सले लिएको छ। नेपालमा भने रिच इन्टरटेन्मेन्ट र एफडी कम्पनीले यसको वितरण गर्नेछन्।
