Sur Cinema

Edit Content
Edit Content

ताजा अपडेट

दर्शकको माग : ‘पर्खी बसेँ तिमीलाई २’ चाहियो

काठमाडौँ : सिनेमा ‘पर्खी बसेँ तिमीलाई’ हेरेर निस्किएका दर्शकले सिक्वेलको माग गरेका छन् । ललितपुरस्थित लाविम मलमा रहेको क्युएफएक्समा प्रतिक्रिया लिन पुगेको निर्माण टिमलाई दर्शकले माग गरेका थिए । निर्माता राजाराम बुढाथोकी, निर्देशक दीपक श्रेष्ठ, नव कलाकारद्वय किरण श्रेष्ठ र रक्षा बुढाथोकी, वितरक करण श्रेष्ठसहितको टिमलाई दर्शकले सिक्वेल बनाउँ आग्रह गरेका हुन् ।

सिनेमा हेरेर निस्किदै गर्दा अधिकांस दर्शकका आँखा रसाएका थिए । उनीहरूले सिनेमाको विषयवस्तुसँगै प्रस्तुतीकरणको तारिफ गरेका थिए । धेरैपछि विशुद्ध प्रेम कथानक सिनेमा हेर्न पाएको भन्दै उनीहरूले तारिफ समेत गरे ।

निर्देशक श्रेष्ठले हल प्रतिक्रिया शत-प्रतिशत सकारात्मक रहेको बताए । ‘म केही समयको अन्तरालमा निर्देशक बनेर आएको थिएँ । युवापुस्ताको प्रेमलाई मैले बुझे अनुरूप प्रस्तुत गरे । यसलाई दर्शकले रिलेट गर्नुभयो, म एकदमै खुसी छु’, निर्देशक श्रेष्ठले भने,‘मैले देखाएको कथा पर्दाबाट दर्शकसम्म पुग्नु मेरो सफलता हो । हाम्रो सिनेमाको व्यापार अपेक्षाकृत छ । दर्शकले नै दर्शक अब हलसम्म ल्याउनु हुनेछ ।’

निर्माता बुढाथोकीले विहिबारसम्म भएको डर हटेको प्रतिक्रिया दिए । उनले आउँदो केही दिन हलमै पुगेर दर्शक प्रतिक्रिया लिने समेत जानकारी दिए । ‘नयाँ कलाकार लिएर आउँदा डर नभएको होइन, तर त्यो भन्दा बढी रहेको आत्मविश्वासले काम गर्यो । नाम नयाँ तर नव कलाकारको काम पुरानै जस्तै छ’, निर्माता बुढाथोकीले भने,‘स्पेसल स्क्रिनीङ र हल प्रतिक्रियाले म ढुक्क भएँ ।’

अभिनेता श्रेष्ठले मण्डला नाटकघर हुँदै सिनेमासम्मको यात्राले बल्ल सार्थकता पाएको बताए । ‘मैले पाईरहेको प्रतिक्रियाले उत्साह थपेको छ । म कलाकार बन्ने सपना बोकेर आएको थिएँ । म कलात्मक र व्यावसायिक दुवै मेकर्सको रोजाईमा पर्ने सिनेमा गर्न चाहन्थे । यसको सुरुआत राम्रो भएको छ’, अभिनेता श्रेष्ठले भने ।

अभिनेत्री बुढाथोकीले प्रत्यक्षसँगै सोसल मिडियामार्फत पाइरहेको प्रतिक्रियाले आगामी यात्रा तय गर्न सहज हुने बताइन । ‘मलाई लभर गर्लको भूमिकामा राम्रो गरेउ भन्ने प्रतिक्रिया प्राप्त भएको छ । यो सिनेमा गर्दा मैले सिकेका कुराहरूले आउँदो समयमा मलाई निकै सहयोग गर्नेछ । आफ्नो सिनेमा हेर्दा केही स्थानमा आफैँ पनि भावनात्मक भएँ’,अभिनेत्री बुढाथोकीले भनिन् ।

काठमाडौँ उपत्यकाका वितरक करण श्रेष्ठले पहिलो दिन सिनेमाको व्यापार उत्साहजनक रहेको जानकारी दिए । ‘पहिलो दिन दर्शकको उपस्थिति राम्रो छ । हेर्नेले सकारात्मक प्रतिक्रिया दिईरहनु भएको छ । यसले आगामी दिनमा दर्शकको चाँप बढाउनेमा विश्वस्त छु’, वितरक श्रेष्ठले भने । उनका अनुसार पहिलो दिनको तुलनामा दोस्रो दिन शनिवार नै सो संख्यामा वृद्धि भएको छ ।

सिनेमा टिमले माघेसंक्रान्तिसम्म उपत्यकाका विभिन्न हलमा पुगेर दर्शक प्रतिक्रिया लिदैछन् । डेब्यु सिनेमामै पाएको प्रतिक्रिया आफूहरू उर्जाशील रहेको नव कलाकार किरण र रक्षाले प्रतिक्रिया दिए ।

रोमन फिल्म र तपश्री फिल्म्स (सिक्किम) को संयुक्त व्यानरमा निर्माण गरिएको सिनेमामा शिव श्रेष्ठ, विल्सन विक्रम राई, सुनिता श्रेष्ठ लगायतका कलाकारले अभिनय गरेका छन् । यसमा राजाराम बुढाथोकीको निर्माण, कोमल गुरुङको सह निर्माण, परिच्छेद सेन, मौनता श्रेष्ठ र पुरुषोत्तम ढुंगेलको लेखन, संकल्प भुजेलको छायांकन, शम्भुजित बाँस्कोटा, दीपक शर्मा, महेश खड्का र बाबुल गिरीको सङ्गीत, भुपेन्द्र अधिकारीको सम्पादन, मनोरञ्जन श्रेष्ठको कलर करेक्सन, रामजी लामिछाने र निशा रसाइलीको नृत्य निर्देशन रहेको छ । सिनेमालाई उपत्यकामा रीच इन्टरटेनमेन्ट र मोफसलमा एफडी कम्पनिले प्रदर्शनका लागि वितरण गरेको छ ।