काठमाडौं : सिनेमा निर्माण कम्पनि अनन्या फिल्मस् प्रालीले मल्टिस्टारर सिनेमा ‘जेरी अन टप’को छायांकन सम्पन्न गरेको छ । सोमबार हिमालपारीको जिल्ला मुस्ताङमा सिनेमाको छायांकन सम्पन्न गरेर कलाकार सहितको निर्माण टिम काठमाडौं रिटर्न भएको छ ।
यो सिनेमामा स्टार अभिनेता अनमोल केसी अभिनेत्रीद्वय आँचल शर्मा र जसिता गुरुङ, चर्चीत हाँस्य अभिनेता केदार घिमिरे ‘माग्नेबुढा’ प्रमुख अभिनयमा छन् । सिनेमामा समावेश हुने दुई गीत बाहेकका सम्पूर्ण दृश्य छायांकन सकेर फर्केका छौं, निर्माता सरोज न्यौपानेले भने, ‘उत्कृष्ट सिनेमा तयार हुनको लागि आवश्यक कुनै पक्षमा सम्झौता गरिएको छैन् ।’
सगरमाथा बेसक्याम्प, काठमाडौं, मुस्ताङ लगायतका ठाउँमा यो सिनेमा खिचिएको छ । सिनेमाका केहि दृश्य काठमाडौंमा झण्डै एक करोडको लागतमा तयार गरिएको सेटमा छायांकन गरिएको थियो । अभिनेता भुवन केसी, अभिनेत्री सुरक्षा पन्त र उषा खड्की पनि यो सिनेमामा प्रमुख अभिनयमा छन् ।
अनमोल पिता अभिनेता भुवन केसीले ‘जेरी अन टप’मा पनि अनमोलको बुवाकै भुमिका निभाएका छन् । बाल कलाकार हुँदै कलाकारितामा प्रवेश गरेका अनमोलले ‘स्टार’को ट्याग पाइसक्दा अनमोल र भुवनलाई एकसाथ स्कृनमा देख्न आतुर दर्शकलाई यो सिनेमा उपयुक्त अबसर बन्नेमा निर्माण टिम विश्वस्त छ ।
कलाकारको लाइनअपदेखि छायांकनसम्म पुग्दा सिनेमाको बजेट झण्डै ६ करोड पुगेको निर्माता न्यौपानेले बताए । गत सातामात्रै यो सिनेमाको अन्तर्राष्ट्रिय वितरण तथा प्रदर्शन अधिकार बिक्री भएको थियो । हङकङमा स्थापना भएको एलजी एसोसिएट्सले ३ करोड बढि एमजी (मिनिमम ग्यारेन्टी) मा ‘जेरी अन टप’को विदेश राइट्स खरिद गरेको बताइएको छ । यद्यपि रकम भने दुबै पक्षले खुलाएका छैनन् । न्यौपानेले विदेश प्रदर्शन अधिकार बिक्री हुँदा सिनेमाको आधा लगानी ‘कभर’ भइसकेको बताए ।
सुयोग गुरुङको निर्देशनमा तयार यो सिनेमाको प्रदर्शन मिति तय भइसकेको छैन । वितरण कम्पनिसँगको सल्लाहमा केहि दिनमै सिनेमाको प्रदर्शन मिति सार्वजनिक गरिने निर्माता न्यौपानेले बताए । सिनेमामा समावेश हुने एक गीत नेपालमा र एक गीत भारतका छायांकन गरिने निर्माण टिमले बताएको छ ।
