Sur Cinema

डान्सरदेखि सिनेमा निर्मातासम्म हरि अधिकारी

काठमाडौं : नेपाली कला, नृत्य तथा सिने क्षेत्रमा लामो समयदेखि सक्रिय हरि अधिकारीले डान्सर र डान्स कोअर्डिनेटर हुँदै चलचित्र निर्माताका रूपमा आफ्नो यात्रा अघि बढाउनुभएको छ। निरन्तर मेहनत, लगनशीलता र अनुभवका आधारमा उहाँले नेपाली सिने क्षेत्रमा समेत आफ्नो छुट्टै पहिचान स्थापित गर्दै आउनुभएको छ।

नेपाली फिल्म एन्ड डान्स एसोसिएसनको कार्यकारी समितिको सदस्यमा निर्वाचित अधिकारी संस्थागत रूपमा पनि कला क्षेत्रको विकासमा योगदान पुर्‍याउँदै आउनुभएको छ। उहाँ अधिकारी फिल्म्स प्रा.लि.का सञ्चालक तथा निर्माता हुनुहुन्छ। उहाँको निर्माणमा ‘दामिनी’, ‘प्रियतम’, ‘लालुपाते’ र ‘दानवीर’ लगायतका सिनेमा निर्माण भएका छन्। तीमध्ये ‘लालुपाते’ र ‘दानवीर’ दर्शकमाझ चर्चित सिनेमाका रूपमा रहेका छन्।

सिनेमा निर्माणसँगै अधिकारीले डान्स रियालिटी शोसमेत निर्माण गर्नुभएको छ, जुन नेपाल टेलिभिजनबाट प्रसारण भएको थियो। नृत्यबाट सुरु भएको उहाँको यात्रा डान्स कोअर्डिनेसन हुँदै सिनेमा निर्माणसम्म आइपुगेको हो। कला क्षेत्रका विभिन्न विधामा निरन्तर सक्रिय रहँदै उहाँले नेपाली कला र सिनेमाको विकासमा योगदान दिँदै आउनुभएको छ।

हाल अधिकारी नेपाली कला तथा सिनेमालाई अन्तर्राष्ट्रिय स्तरमा पुर्‍याउने लक्ष्यसहित नयाँ परियोजनाको तयारीमा जुट्नुभएको छ। उक्त परियोजनालाई विश्वव्यापी रूपमा प्रदर्शन गर्ने र विदेशमा समेत छायाङ्कन गर्ने उहाँको योजना छ।

नृत्य क्षेत्रबाट सिनेमा निर्माणसम्मको यात्रा तय गर्नुभएका अधिकारी नेपाली सिने क्षेत्रमा नयाँ सम्भावनाको खोजी गर्दै अघि बढिरहनुभएको छ। नेपाली कला र सिनेमालाई अन्तर्राष्ट्रिय बजारसम्म विस्तार गर्ने उहाँको योजनाले आगामी दिनमा कस्तो रूप लिन्छ, त्यो भने प्रतीक्षाको विषय बनेको छ।