२६ असोज २०७९
काठमाडौं : केही महिना अघि एकाएक सामाजिक संजालबाट टाढा रहेकी नायिका पूजा शर्मा पुनः मिडियामा देखिएकी छिन् । गत शुक्रबारबाट प्रदर्शनमा आएको सिनेमा ‘दुई नम्बरी’को विशेष शो’ हेर्न सहभागी बनेकी पूजा मिडियामा समेत देखिइन।
किरण नेपाली निर्माता रहेको उक्त सिनेमाको विशेष शो राजधानीमा सोमबार राखिएको थियो। विशेष शो हेरिसकेपछि पूजाले मिडियाकर्मीका अगाडि सिनेमा एकदम राम्रो बनेको भन्दै प्रशंसा गरेकी थिइन् । पूजा सिनेमाको मात्रै नभएर उक्त सिनेमामा अभिनय गरेकी भुटानी नायिका उगेन छोदेनको समेत तारिफ गर्न भ्याइन। उगेनको सामुन्ने मै पूजाले उगेनको अभिनयको तारिफ गरेकी हुन् ।
सिनेमा हेरिरहँदा उगेनको अभिनय नयाँ नलागेको र एकदम प्रोफेसनल अभिनय लागेको पनि पूजाले बताइन् । साथै, पूजालाई भेट्न पाउँदा उगेन पनि निकै खुशी देखिन्थिन् । ‘उहाँ आउने कुरा थाहा थियो’, उगेनले मिडियाको अगाडि भनिन् , ‘आज भेटेर निकै खुशी लाग्यो।’ पूजाले पनि नेपाली सिनेमामा उगेनको निरन्तरता हुन जरुरी रहेको बताइन् । उगेनको यो पहिलो नेपाली डेव्यु सिनेमा हो। दर्शकले पनि उगेनको अभिनयलाई मन पराएका छन् ।
