काठमाडौं : अभिनेत्री तथा निर्देशक नीता ढुंगानाको डेब्यु निर्देशन रहेको चलचित्र ‘सुख दु:ख’ मा वरिष्ठ कलाकार मदनकृष्ण श्रेष्ठ आधिकारिक रूपमा अनुबन्धित भएका छन्। शुक्रवार नीता फिल्म्सको ब्यानरमा निर्माण हुन लागेको यस चलचित्रको लागि उनले सम्झौता पत्रमा हस्ताक्षर गरेका हुन् ।
मदनकृष्ण श्रेष्ठले यसअघि धेरै सिनेमामा काम गर्न नमानेको भए पनि ‘सुख दु:ख’को कथावस्तु मन परेकोले यसमा काम गर्न राजी भएको बताएका छन्। यसैगरी, गत आइतबार मात्रै अर्की वरिष्ठ अभिनेत्री मिथिला शर्मा पनि यस चलचित्रमा अनुबन्धित भइसकेकी छन्। यी दुई दिग्गज कलाकारको प्रवेशले निर्देशक नीता ढुंगाना निकै उत्साहित देखिएकी छन्।
छायांकन र प्रदर्शनको तयारी
‘सुख दु:ख’को छायांकनका लागि चर्चित भारतीय छायाँकार कवीरलाल र शाहिदलाल पनि यसअघि नै अनुबन्धित भइसकेका छन्। चलचित्रको निर्माण व्यवस्थापनको जिम्मेवारी शंकर पाण्डेले सम्हालेका छन्।
निर्माण पक्षले यो चलचित्र आगामी वर्ष दसैंको फूलपातीको दिन प्रदर्शनमा ल्याउने योजना बनाएको छ। चलचित्रको वितरण अधिकार पनि तय भइसकेको छ। उपत्यका बाहिरका लागि एफडी कम्पनीले र उपत्यकाभित्रको लागि रिच इन्टरटेनमेन्टले वितरणको जिम्मा पाएका छन्।
