काठमाडौं
काठमाडौंको जमल स्थित सांस्कृतिक संस्थानको हलमा बुधबारबाट तीन दिवसीय ‘पाचौं पिम नेपाल फिल्म फेस्टिबल–२०२२’ सुरु भएको छ । नेपालका प्रथम उपराष्ट्रपति परमानन्द झाले बुधबार यो फेस्टिबलको उद्घाटन गरेका हुन् ।
समारोहलाई सम्बोधन गर्दै प्रथम उपराष्ट्रपति झाले यस्तो प्रकारका महोत्सबले सिने क्षेत्रका कलाकार प्राविधिक र निर्माताहरुलाई थप उर्जा प्रदान गर्ने विश्वास व्यक्त गर्दै फेस्टिबलको सफलताको कामना गरे । महोत्सबमा बसेर उनले नेपाली सिनेमा प्रकाश पनि हेरे ।
महोत्सको उद्घाटन समारोहमा सिनेमासँग सम्बन्धित ८ वटा संस्थाका नवगठित कार्यसमितिका पदाधिकारीलाई बधाई पत्र प्रदानसहित आगामी सफल कार्यकालको कामना गरियो ।
कार्यक्रममा नेपाल चलचित्र कलाकार संघ, नेपाल चलचित्र निर्देशक समाज, चलचित्र पत्रकार संघ नेपाल, चलचित्र नृत्य संघ, नेपाल चलचित्र प्राविधिक संघ, नेपाल चलचित्र द्धन्द्ध कलाकार संघ र चलचित्र संघका पदाधिकारीलाई बधाई ज्ञापन गरिएको हो । सोही समारोहमा नृत्य निर्देशक दिनेश पाख्रिन, सञ्चारकर्मी तथा संगीतकार सुवास प्रधानलाई सम्बन्धित विधामा योगदान पुर्याए बापत सम्मान गरियो ।
महोत्सब आयोजक संस्था पिम नेपालका अध्यक्ष, फेष्टिवलका निर्णायक प्रमुख एवं सिनेमा निर्देशक माधवराज खरेलले कार्यक्रमलाई सम्बोधन गर्दै भने,‘नेपालमा सरकारी क्षेत्रका सिनेमा सम्बन्धि राष्ट्रिय तथा अन्तराष्ट्रिय महोत्सवहरु हुन नसकेको अबस्थामा हामीले यस्ता महोत्सब गरेर सिनेमा उधोगलाई प्रोत्साहन गरेका छौं । महोत्सबमा प्राप्त सिनेमाहरुले बिगतमा झैं यसपटक पनि दर्शकको मन जित्नेमा हामी विश्वस्त छौं ।’ महोत्सबमा प्राप्त सिनेमाहरुले बिगतमा झैं यसपटक पनि दर्शकको मन जित्नेमा हामी विश्वस्त छौं ।’
यस्तै, नेपाल चलचित्र कलाकार संघका अध्यक्ष मोहन निरौलाले पिम नेपालले महोत्सब तथा विभिन्न अवार्ड मार्फत नेपाली सिनेमा तथा गीत संगीतमा दिएको योगदान प्रसँसनीय छ भने ।
क्रियटिभ डिरेक्टर एवम् सञ्चारकर्मी शान्ति प्रियले उद्घाटन समारोहलाई सम्बोधन गर्दै एक दशक अघि सर्ट फिल्म फेस्टाबाट सुरु भएको फिल्म महोत्सबलाई अनुसरण गर्दै पिमले पनि आयोजना गर्दै आएको बताए । राज्यले कत्ति पनि सहयोग नगरेको अबस्थामा पनि यस्ता महोत्सबहरु आयोजकले जेनतेन सञ्चालन गर्दै आएको बताए ।
पिम नेपाल फिल्म फेस्टिबलकी आयोजक तथा उद्घाटन समारोहकी सभापति कमला जोशीले महोत्सबमा प्रदर्शन हुने सिनेमाको बारे जानकारी गराईन् ।
यसपटक महोत्सबको उद्घाटन समारोहमा दिनेश राउत निर्देशित तथा प्रदीप खड्का अभिनित सिनेमा प्रकाश प्रदर्शनी गरियो । यस्तै बुधबार नै महोत्सबमा ‘प्रकाश’ पछि ‘ऐना झ्यालको पुतली’ , नेपाल भाषाको सिनेमा ‘उच्च शिक्षा’ र मैथली भाषाको सिनेमा ‘फु’ प्रदर्शन गरियो । शुक्रबार सम्म चल्ने यो महोत्सबमा यसपटक नेपाली, नेपालभाषा, तामाङ, मैथली, भोजपुरी गरी ढेड दर्जन लामा तथा छोटा चलचित्र र बृत्तचित्र प्रदर्शन हुँदैछन् ।
जसमा बिहिबार तामाङ सिनेमा ‘आप्लेङग ला नाम्सा’ सिनेमा ‘डेसान’, भोजपुरी सिनेमा ‘मधेशी पुत्र २’, मैथली सिनेमा ‘समय के खेला’ लगायत लामा तथा छोटा सिनेमाहरु प्रदर्शन गरिने भएको छ । यस्तै शुक्रबार महोत्सबमा सिनेमा ‘बगान’ र ‘लाखे’ प्रदर्शनी हुने भएको छ । अवार्ड प्रदान गर्दै असार पन्ध्र मनाउदै महोत्सब शुक्रबार सम्पन्न हुने बताईएको छ ।
