काठमाडौं : पछिल्लो समय तीज गीतहरू दैनिक आधा दर्जन बढी रिलिज भइरहेका हुन्छन्। रिलिज भएका कतिपय गीतले तारिफ बटुलिरहेका छन् त कतिपय गीतले आलोचना पनि। यसैबीचमा तीज गीत ‘घुमाउँछु चार दिन’ पनि बजारमा रिलिज भएको छ।
यो गीत केही दिन अघि मात्रै रिलिज भएको हो। गीतमा विज्ञान न्यौपाने र सुनिता बुढाको सुमधुर आवाज रहेको छ। गीतको शब्द अनि संगीत आयान न्यौपानेको रहेको छ। गीत एकदम मेलोडियस छ। माया प्रेमका भावहरुलाई गीतमा समावेश गरिएको छ। झट्ट सुन्दा जोकोहीलाई नाँचौनाँचौ लाग्न सक्छ। गीतको अडियो पक्ष सशक्त छ।
यता भिडियोमा भने ४ जना मोडलहरुलाई छमछमी नाँचेको देख्न सकिन्छ। गीता ढुंगाना, काजिश श्रेष्ठ, अर्जुन सापकोटा र विपासा चदाराको आकर्षक नृत्यले भिडियोलाई मनमोहक बनाएको छ। भिडियोलाई काजिश श्रेष्ठले निर्देशन गरेका हुन्।
आकर्षक फ्रेम अनि लोकेसनमा राजेश घिमिरेले खिचेको भिडियोलाई दीपक बिष्टले सम्पादन गरेका हुन्। भिडियो विज्ञान न्यौपानेको अफिसियल युट्युब च्यानलबाट रिलिज गरिएको हो।
गीत रिलिज भएको ३ दिन भयो तर गीतले सोचेजस्तो युट्युबमा भ्युज भने पाउन सकेको छैन। यद्यपि गीतलाई राम्रो प्रतिक्रिया भने मिलेको छ। आशा अनुरुप गीतले सफलता नपाएपनि आफूहरु खुशी भएको आयान र विज्ञान बताउँछन्। आफ्नो सृजनालाई सुन्ने जतिले राम्रो प्रतिक्रियाले सन्तुष्ट मिलेको आयानले बताए।
आयान र विज्ञानको यो पहिलो सहकार्य हो।दुबैजना नेपाली सांगीतिक क्षेत्रका लागि सम्भावना बोकेका कलाकारहरु हुन्। मीठो गायिकी भएका विज्ञानले यस् अघि पनि ‘रेलिमै’, ‘देशको हालत’, ‘चितवन भरतपुर’ लगायतका गीतमा आवाज दिइसकेका छन्।
त्यस्तै आयानले पनि दर्जनौं गीतहरू सृजना गरिसकेका छन्। विशेषगरि शब्द सृजना गर्न र मेलोडी बनाउन रुचाउने आयानको ‘मुटु बैना’ सर्वाधिक लोकप्रिय गीत हो। यसै गीतबाट आयानलाई एउटा राम्रो सर्जकको रुपमा सांगीतिक क्षेत्रमा चिन्न थालिएको हो।
आयान र विज्ञानले छिट्टै नयाँ सहकार्य गर्दैछन्। आयानकै शब्द र संगीतमा विज्ञानले नयाँ लोक दोहोरी गीत बजारमा ल्याउन लागेको बताइएको छ। यि दुबैजना देश बाहिर बस्छन्। विज्ञान अष्ट्रेलिया बस्दै आएका छन् भने आयान भारतको बैंगलोर बस्दै आइरहेका छन्।
