काठमाडौं : अशोक थापा मगर निर्देशित सिनेमा ‘खुस्मा’को पहिलो गीत रिलिज गरिएको छ। मंगलबार केन्द्र मोसन पिक्चर्सको युट्युव च्यानलबाट ‘खुशीका फूल बटुलेर’ बोलको गीत रिलिज गरिएको हो।
गीत रोमान्टिक भावमा रहेको छ। एसडी योगी र विज्ञानी पराजुलीको स्वर गीतमा सुन्न सकिन्छ। गीतको शब्द राम अविरल विष्टले लेखेका हुन् भने संगीत एसडी योगीले भरेका छन्। गीत एकदम प्रेमिल छ।
यता भिडियोमा चाहिँ सिनेमाका मुख्य कलाकार धिरज मगर र उपासना सिंह ठकुरी फिचर्ड छन्। भिडियोमा धिरज र उपासनालाई निकै रोमान्टिक भावमा देख्न सकिन्छ। उनीहरुको प्रेमिल जोडीले सुन्दर बनेको छ भिडियो। गीतका शब्दहरुलाई उनीहरूको प्रेमिल सम्बन्धले अर्थपूर्ण बनाएको छ।
एम मिडिया प्रालिको ब्यानरमा निर्माण भएको सिनेमाका निर्मातामा विर बहादुर लामा, चन्द्र बहादुर भट्टचन र बेतान मगर छन्, भने सह-निर्मातामा मान बहादुर धनाह मगर र सुस्मिता बुढाथोकी हुन् । मोहन राई कार्यकारी निर्माता रहेको सिनेमामा दिपक बज्राचार्यको छायांकन रहेको छ ।
धिरज र उपासनाका अलावा सिनेमामा माओत्से गुरुङ, खड्क बहादुर पुन (खबपु), सुजाता राई, विजय सुब्बा, राज थापा काउचा, अस्तित्व भट्टचन, संगीता थापा मगर, अरुन मगर, सारा राई, श्वेता मिश्र, विवेश मगर लगायतका कलाकारको अभिनय रहेको छ ।
